Nga Peza, ku një tjetër shkollë po ringrihet nga rrënojat e tërmetit të 26 Nëntorit, Erion Veliaj ka bërë thirrje për bashkim dhe jo për rikthim në mesjetën e atyre që bëjnë thirrje terroriste për vota e pushtet. “Sot është një ditë e mirë për Pezën. Çdo 16 Shtator ne vijmë për të përkujtuar Konferencën e Pezës, e cila bashkoi shqiptarët kudo, përtej të majtës dhe të djathtës, përtej veriut dhe jugut, një mesazh që na duhet sot më shumë se kurrë. Na duhet të bashkohemi! Nuk ka asnjë arsye që dikush nga Tropoja të luftojë me dikë në Elbasan, apo dikush nga Tepelena të luftojë me dikë në Shkodër. Nuk është kjo fryma e Konferencës së Pezës dhe nuk duhet të jetë as fryma e 25 Prillit”, tha Veliaj. Duke dënuar ashpër gjuhën e përdorur nga Xhelal Mziu i cili bënte thirrje për të vrarë si në Elbasan, drejtuesi politik i Partisë Socialiste për Tiranën tha se në 25 Prill duhet të gjithë tu tregojmë vendin me votë atyre që flasin për grupe terroriste e ekzekutime publike.