Një shtetas që vuante dënimin në burgun e Fierit ka humbur jetën në rrethana ende të paqarta. Burime pranë institucionit të vuajtjes së dënimit i thanë Top Channel thanë se i dënuari Ardjan Malasi kishte kërkuar ndihmën mjekësore teksa ndodhej brenda qelisë dhe ka humbur ndjenjat pasi u transferua ne infermieri. Menjëherë është bërë transportimi i tij drejt spitalit të Fierit por mjekët konstatuan vdekjen e tij. Në burgun e Fierit sakaq kanë nisur hetimet për te zbardhur rrethanat e vdekjes së të dënuarit, trupi i të cilit do t’i nënshtrohet autopsisë, ndonëse paraprakisht ka dyshime se mund të ketë pësuar hemoragji celebrale. 58-vjeçari me origjinë dhe banim në Ballsh, Ardjan Malasi ishte transferuar disa muaj më parë nga burgu 313 i Tiranës, i dënuar nga GJKKO-ja për pastrim të produkteve të veprës penale si pjesëmarrës në aktivitete të rënda të krimit të organizuar, me 10 vjet burg. Pas shpalljes së vendimit të prerë, SPAK nxori urdhrin zyrtar të ekzekutimit në korrik të këtij viti. Për këtë arsye, më 16 korrik Ardjan Malasi u transferua nga Burgu 313 në Tiranë, ku qëndronte nën masën e paraburgimit, drejt burgut të sigurisë së lartë në Fier për të vijuar pjesën tjetër të dënimit. Hetimet e SPAK lidhur me grupin ku bënte pjesë Malasi treguan një skemë të mirëfilltë të pastrimit të parave përmes investimeve.