Vdekja e Ratko Mlladicit mbyll një kapitull të errët të historisë, por për ish prokurorin e Gjykatës së Hagës Geoffrey Nice, ajo lë ende pa përgjigje një nga pyetjet më të rëndësishme për masakrën e Srebrenicës. Nice, i cili drejtoi edhe çështjen kundër ish-presidentit serb Sllobodan Milloshevic, thotë se pyetja kryesore është si e dinte Mlladici më 10 dhe 11 korrik 1995 se mund të hynte në Srebrenicë dhe të bënte atë që bëri?. “Nuk jam i sigurt nëse kjo ka qenë ndonjëherë objekt i një përfundimi të qartë, megjithëse ekzistojnë shumë prova që të paktën tregojnë një pjesë të prapavijës së ngjarjeve që mund të jetë e rëndësishme”, u shpreh ai duke treguar se mund të ketë pasur informacione të inteligjencës, vlerësime të situatës apo edhe informacion të përcjellë nga dikush në Perëndim. Por tani që Mlladicika vdekur, mundësitë për ta zbardhur plotësisht këtë çështje janë më të vogla. Nice thekson për REL se ekzistojnë prova të shumta që lidhen me zhvillimet para masakrës, por ato nuk janë analizuar dhe lidhur në mënyrë sistematike. Duke komentuar pretendimet se Mlladici mund të jetë vrarë, Nice i cilëson ato si përpjekje për të nxitur reagime emocionale dhe përçarëse, duke theksuar se nuk ekzistojnë prova që e mbështesin një arsyetim të tillë. Ish-prokurori e konsideron dokumentacionin e Tribunalit të Hagës një burim të paçmuar për historianët, ndërsa thotë se aktgjykimet mund të ndikojnë edhe në kujtesën kolektive për krimet e luftës. Por Nice shprehet pesimist për të ardhmen e drejtësisë ndërkombëtare. Sipas tij, rendi ndërkombëtar është dobësuar ndjeshëm dhe fuqitë e mëdha nuk duan t’i nënshtrohen hetimeve apo gjykimeve nga institucione ndërkombëtare. Ai thotë se një gjyatë e ngjashme me atë të Hagës nuk do të themelohej më sot, ndërsa paralajmëron se edhe Gjykata Ndërkombëtare Penale rrezikon të dobësohet më tej.