Zbardhen detaje të reja në lidhje me vdekjen e 13-vjeçares shqiptare, Aurora në Piacenza të Italisë. I dashuri i saj, 15 vjeç, ka mbetur në burg, pasi akuzohet për vrasjen e së miturës. Mediat italiane shkruajnë se sipas një dëshmitari okular “15 vjeçari ka rrëzuar nga ballkoni i katit të 7-të viktimën”. Dëshmitari, i cili dha informacione të konsideruara vendimtare për vdekjen e Aurorës, tha se kishte parë djalin nën hetim të hidhte vajzën 13-vjeçare nga ballkoni. Ndërkohë hetuesit kanë rindërtuar atë që ka ndodhur dhe nënvizojnë tentativën e dëshpëruar që bëri Aurora për të shpëtuar veten: “Ajo u përpoq të kapej te parmaku, por ai e goditi dhe për pasojë ajo ra nga kati i 7-të i pallatit”. Motra dhe nëna e Aurorës gjithashtu konfirmuan se 15 vjeçari ishte i dhunshëm dhe shpesh e rrihte atë. Motra e viktimës shkroi në rrjetet sociale se djali “ e rrahu, e tërhoqi zvarrë në katin e shtatë dhe e hodhi poshtë. Më pas ai shkoi në lokal, lau duart dhe thirri 118 duke thënë se ajo kishte kryer vetëvrasje”, sipas mediave vendase. Ajo tha se ishte e sigurt se “Aurora kishte frikë prej tij” dhe për këtë arsye donte ta linte.