Mijëra bombola të zbrazura gazi qëndrojnë jashtë në një ish-rafineri pranë kryeqytetit të Meksikës, duke krijuar një erë të rëndë që trazon prej kohësh banorët e kësaj zone. Shumë prej tyre shqetësohen se gazi i lëngshëm do të rrjedhë nga bombolat dhe do të shpërthejë ose nga rrjedhja të dëmtohet shëndeti i banorëve të zonës. Thuajse çdo mbrëmje Cesar Rivera dhe gruaja e tij dalin nga apartamenti pasi era bëhet e padurueshme, thotë 37 vjeçari për rrjetin AFP. "Era bëhet e fortë natën, është sikur të mos kesh fikur mirë soben e gazit. Administratorët na kanë kërkuar të mos pijmë duhan apo të mos përdorim sobën kur era është e fortë”. Në pamjet nga ajëri shihet varreza gjigante e bombolave të gazit në perëndim të kryeqytetit, e rrethuar nga zona rezidenciale. Dikur këtu ishte rafineria shtetërore e naftës ndërsa tani është kthyer në varrezën e mijëra bombolave shumëngjyrëshe të gazit. Rivera shton se ai dhe gruaja vuanin prej muajsh prej erës, por vetëm kohët e fundit e kuptuan burimin e saj. Gazi i lëngshëm përbëhet kryesisht nga butan e propan, dhe nuk ka erë, por ajo shtohet nga prodhuesit me qëllim detektimin e tij.