Shtetet e Bashkuara po synojnë zvogelimin e varësisë se Ballkanit Perëndimor nga gazi rus, duke krijuar një rrjet marrëveshjesh për importin e gazit të lëngshëm (LNG) dhe projekte energjetike në Shqipëri, Mal të Zi, Kosovë, Serbi, Kroaci, Bosnje e Hercegovinë e Maqedoni të Veriut. Këto projekte thekson REL, përfshijnë gazsjellës, terminale LNG dhe termocentrale me gaz, me mbështetje politike dhe financiare nga SHBA dhe BE. Media e njohur kujton se Shqipëria po zhvillon një terminal LNG dhe termocentral në Vlorë, me lidhje me Gazsjellësin Trans-Adriatik dhe Jon-Adriatik, që mund të furnizojë edhe vendet fqinje dhe pjesë të tjera të rajonit. Shkupi, aktualisht, është duke ndërtuar infrastrukturë të re të gazit me mbështetjen e Uashingtonit dhe Brukselit. Bosnje dhe Hercegovina po ndryshon modelin e furnizimit, me lidhje të reja me Kroacinë për LNG dhe projekte energjetike që mund të furnizojnë qindra mijëra familje, duke reduktuar varësinë nga Moska. Serbia po zgjeron rrjetin e gazit duke hapur mundësi për LNG amerikan dhe investime perëndimore, edhe pse shumica e gazit vijon të vijë nga Rusia. Mali i Zi planifikon terminal LNG në Tivar. Kosova mbetet aktualisht pa infrastrukturë gazi dhe bazohet kryesisht në termocentrale me qymyr. Projekti për një interkonektor gazi me Maqedoninë e Veriut është përfshirë më herët në planin investues të BE-së për Ballkanin Perëndimor, por sipas Prishtines zyrtare është ndaluar mometalisht per shkak te kostove të larta. Tubacioni do t’i jepte Kosovës qasje te gazi nga terminalet greke të LNG-së në Detin Egje, dhe ideja ishte të ndërtohej edhe një tubacion drejt Shqipërisë. Ekspertët theksojnë se ndërtimi i infrastrukturës duhet të shoqërohet me kontrata afatgjata të besueshme me furnizues të ndryshëm për të garantuar siguri energjetike.