Kulla Eiffel dhe monumentet e tjera të Parisit u mbyllën gjatë fundjavës dhe Turi ciklistik I Francës shkurtoi një fazë për herë të parë në historinë e tij, ndërsa vendi përballon valën e tretë të të nxehtit që nga maji. Prej së shtunës një e katërta e Francës ishte nën nivelin më të lartë të alarmit për nxehtësi në vend, përfshirë rajonin e Parisit. Operatori i Kullës Eiffel tha se monumenti prej çeliku me rrjetë do të "mbyllet për shkak të temperaturave të larta të parashikuara". Kulla 324 metra e lartë, e cila tërheq shtatë milionë turistë në vit, zakonisht qëndron e hapur pas mesnatës gjatë sezonit. Dy nga muzetë më të famshëm të kryeqytetit francez, Luvri dhe Musee d'Orsay, kanë marrë masa të ngjashme. Njëzet e katër departamente, ku banojnë 22.2 milionë banorë janë nën alrmin e kuq të vapës, ndërsa 59 departamente të tjera nga 96 në Francën kontinentale ishin nën një paralajmërim për vapë portokalli. Sakaq, referuar të njëjtës periudhë të një viti më parë, Franca përllogarit dy herë më shumë tokë të djegur nga zjarret. Presidenti francez Emmanuel Macron bëri thirrje për vigjilencë të shtunën, duke paralajmëruar se nëntë nga 10 zjarre janë për shkak të aktivitetit njerëzor.