Një valë infeksionesh gastroenteriti që janë rezistente ndaj antibiotikëve po rritet në Evropë, sugjerojnë shifrat e reja. Gjithsej 203 raste të shigelozës, të shkaktuar nga bakteri Shigella, janë raportuar në Qendrën Evropiane për Parandalimin dhe Kontrollin e Sëmundjeve (ECDC) në tre muajt që nga prilli. Kjo është pothuajse aq e lartë sa totali i raportuar midis nëntorit 2021 dhe shkurtit 2023. Bakteri i cili shkakton diarre akute, ethe, nauze, të vjella dhe dhimbje barku, ka ekzistuar për një kohë, me 95 raste britanike që nga viti 2021. Por numrat e infeksioneve janë rritur muajt e fundit dhe rastet e fundit janë tepër rezistente ndaj trajtimeve me ilaçe, thonë shefat e shëndetësisë. ECDC thotë se të gjitha llojet e lidhura me këto raste tregojnë rezistencë ndaj antibiotikëve të linjës së parë dhe të dytë, të cilat janë trajtime që mjekët preferojnë t’i përshkruajnë fillimisht, pasi kanë rrezik më të ulët të efekteve anësore. Disa shtame ende mund të trajtohen me një antibiotik tjetër të zakonshëm, azitromicinë. Por shtamet e tjera janë rezistente ndaj tij, duke shkaktuar shqetësim të veçantë te mjekët pasi kufizon opsionet për trajtim efektiv sipas ECDC. Gjatë vitit të kaluar janë raportuar 26 raste në Belgjikë, 13 raste në Danimarkë, 33 raste në Gjermani, 50 raste në Irlandë, 21 raste në Holandë dhe në Spanjë më shumë se 60 raste. Këto raste të fundit janë kryesisht, por jo ekskluzivisht mes burrave që bëjnë seks me burra. Bakteret Shigella përhapen përmes feçeve të njeriut, zakonisht përmes seksit oral-anal, por edhe aktiviteteve joseksuale si kontakti me duart dhe objektet që kanë qenë në kontakt me feçet.