Moderna dhe Merck kanë njoftuar rezultate pozitive nga faza e tretë e provave klinike për një vaksinë të personalizuar kundër melanomës, forma më vdekjeprurëse e kancerit të lëkurës. Trajtimi eksperimental, i quajtur Intismeran, përdor teknologjinë mRNA dhe përgatitet posaçërisht sipas mutacioneve të tumorit të çdo pacienti. Ai përdoret së bashku me imunoterapinë Keytruda të Merck-ut, për të ndihmuar sistemin imunitar të njohë dhe të shkatërrojë qelizat kancerogjene. Studimi përfshiu 1 mijë e 137 pacientë me melanoma të fazave nga 2B deri në 4, të cilëve tumori u ishte hequr me ndërhyrje kirurgjikale. Kombinimi uli ndjeshëm rrezikun e rikthimit dhe përhapjes së kancerit, krahasuar me përdorimin vetëm të Keytruda-s. Nuk u identifikuan probleme të reja sigurie. Megjithatë, kompanitë nuk kanë publikuar ende përqindjet e plota të fazës së tretë dhe as të dhënat për mbijetesën e përgjithshme. Në fazën e mëparshme, trajtimi uli me 49 për qind rrezikun e rikthimit të sëmundjes ose vdekjes dhe me 59 për qind rrezikun e metastazave ose vdekjes. Lajmi shkaktoi një reagim të jashtëzakonshëm në bursë. Aksionet e Moderna-s u rritën me 177 për qind, duke u mbyllur në 174 dollarë, ndërsa vlera e kompanisë u shtua me rreth 44 miliardë dollarë. Aksionet e Merck-ut u rritën me 12.6 për qind dhe arritën nivel rekord. Vaksina mbetet eksperimentale dhe mund të dalë në treg gjatë vitit 2027, vetëm nëse miratohet nga autoritetet rregullatore.