Një 48 vjeçar grek është arrestuar nga policia në vendin e quajtur Koropi në Athinë pasi u kap duke falsifikuar vajin e ullirit të etiketave të ndryshme. Policia tha se kishte arritur të zbulonte se autori importonte nga Bullgaria dhe Moldavia sasi të mëdha vaji bimor, kryesisht lulediell ose kikiriku dhe pasi e përpunonte me lëndë kimike dhe aromatizues, e kthente atë në vaj ulliri të virgjër dhe ekstra të virgjër të cilin e shiste në markete dhe një sasi të madhe e eksportonte me etiketa të ndryshme edhe në Shqipëri dhe Bullgari. Në cilësinë e provës materiale u gjet sasia prej 14 tonë vaj bimor, 6 ton vaj i përpunuar dhe falsifikuar me etiketë të gatshme dhe në dukje ulliri, 2 automjete, sasi lëndësh kimike dhe aromatizues të ndryshëm. Po ashtu policia sekuestroi 700 teneqe llamarinë bosh dhe mijëra bidona plastikë dhe etiketa të markave të ndryshme.