Forcat ukrainase pohuan se ushtria e Moskës ka hyrë në rajonin industrial lindor të Dnipropetrovsk dhe po përpiqet të krijojë bazën e saj atje. "Ky është sulmi i parë në një shkallë kaq të madhe në rajonin e Dnipropetrovsk," i tha BBC-së Viktor Trehubov, nga Grupi Operacional-Strategjik i Trupave të Dnipros, i cili insistoi megjithatë se avancimi i tyre është arritur të frenohet. Rusia vazhdimisht ka treguar gjatë verës se trupat e saj i janë afruar zonës teksa përpiqen të depërtojnë më thellë në territorin ukrainas nga rajoni i Donetskut. Në fillim të qershorit, zyrtarët rusë thanë se një ofensivë kishte filluar në Dnipropetrovsk, ndërsa raportet ukrainase përpiqen t`i minimizojnë deklaratat e Moskës për avancim të ndjeshëm, duke insistuar se ushtria e kësaj të fundit mezi ka shkelur kufirin rajonal. BBC nuk e shikon cështjen të lidhur thjesht me përparime të vogla në terren. Ajo thotë se cdo avancim rus në Dnipropetrovsk do të ishte një goditje e fortë për moralin ukrainas, aq më tepër tani kur përpjekja diplomatike e udhëhequr nga Shtetet e Bashkuara për t'i dhënë fund luftës duket se po e humbet hovin që mori fillimisht pas takimit të Presidentit Donald Trump me Vladimir Putinin e Rusisë në Alaskë. Së fundi, llogaritet që trupat ruse të kenë pushtuar tashmë dy fshatra brenda rajonit, Zaporizke dhe Novohryhorivka, edhe pse shtabi i përgjithshëm i forcave të armatosura të Ukrainës këtë nuk e pohon. Ushtria ukrainase "vazhdon të kontrollojë" Zaporizke, tha ajo në një deklaratë, dhe "armiqësitë aktive po vazhdojnë gjithashtu në zonën e fshatit Novohryhorivka". Moska nuk ka ngritur publikisht pretendime për Dnipropetrovskin, ndryshe nga Donetsk dhe katër rajonet e tjera lindore të Ukrainës, por ajo nga ana tjetër ka sulmuar qytetet e saj të mëdha, duke përfshirë kryeqytetin rajonal Dnipro.