Forcat izraelite vazhduan sulmin ndaj qytetit jugor të Rafahut, një ditë pasi grupi militant Hamas tha se e pranonte propozimin për armëpushim të ndërmjetësuar nga Egjipti dhe Katari, por për të cilën Izraeli tha se nuk përmbushte kërkesat kryesore të tij. Izraeli mori nën kontroll kalimin kufitar të Gazës me Egjiptin të martën në mëngjes, përmes të cilit futen pjesa më e madhe e ndihmave humanitare. Tanket izraelite u futën më thellë në qytet ku mbi një milionë banorë po strehohen në tenda dhe ndërtesa banimi të mbipopulluara. Gjatë natës, Izraeli kreu disa bombardime në Rafah, duke lënë të paktën 23 palestinezë të vrarë, përfshirë gjashtë gra dhe pesë fëmijë, sipas regjistrave të spitalit. Operacioni izraelit në Rafah megjithatë duket se nuk i ngjan një ofensive të plotë siç e kishte planifikuar Izraeli, por mbetet e paqartë nëse ai do të zgjerohet në ditët në vijim. Presidenti Biden e paralajmëroi kryeministrin izraelit Benjamin Netanyahu kundër një operacioni të tillë pak orë para se Izraeli ta fillonte atë. “Ne i kemi bërë të qarta qëndrimet tona rreth operacioneve në Rafah, të cilat mund të shtojnë rrezikun për mbi një milionë të zhvendosur. Gjatë telefonatës me Netanyahun, presidenti sërish e bëri të qartë këtë qëndrim, ne besojmë që një marrëveshje për lirimin e pengjeve është mënyra më e mirë për të siguruar lirimin e tyre”, deklaroi zëdhënës i Shtëpisë së Bardhë, John Kirby. Kundër ofensivës izraelite në qytetin e Rafahut u shpreh edhe Përfaqësuesi i lartë i Bashkimit Evropian për Politikën e Jashtme dhe Sigurinë, Josep Borrell. Përkundër paralajmërimeve, sulmi filloi mbrëmë dhe mund të shkaktojë sërish shumë viktima civile. Bëhet fjalë për 600 mijë fëmijë në Gaza, deklaroi Borrell. Ndërkohë, mijëra palestinezë vazhdojnë të ikin nga Rafah, i cili sipas Izraelit mbetet bastioni i fundit i grupit militant të Hamasit, të cilin është zotuar ta shkatërrojë pas sulmit të 7 tetorit ndaj vendbanimeve izraelite.