Zbardhet urdhri i plotë i Presidentit të Shteteve të Bashkuara, Donald Trump, për ngrirjen e fondeve për vendet e huaja, që prek edhe Shqipërinë. Urdhri, i publikuar në faqen zyrtare të Shtëpisë së Bardhë, mban datën 20 janar, ditën kur Donald Trump u betua si President i SHBA. “Industria dhe burokracia e ndihmës së huaj të Shteteve të Bashkuara nuk janë të lidhura me interesat amerikane dhe në shumë raste janë të kundërta me vlerat amerikane, që shërbejnë për të destabilizuar paqen botërore. Të gjithë drejtorët e departamenteve dhe agjencive përgjegjëse për programet e ndihmës së zhvillimit të huaj të Shteteve të Bashkuara duhet të ndalojnë menjëherë detyrimet dhe shpërndarjet e fondeve të ndihmës së zhvillimit për vendet e huaja”. Sipas urdhrit të lëshuar nga Trump, pas 90 ditësh, nëse një program është vlerësuar pozitivisht dhe është në përputhje me politikën e jashtme të SHBA-së, mund të rinisë financimi i tij. “Drejtorët e departamenteve dhe agjencive përgjegjëse do të bëjnë përcaktimet brenda 90 ditëve nga ky urdhër nëse do të vazhdojnë, modifikojnë, ose ndalojnë secilin program të ndihmës së huaj. Detyrimet dhe shpërndarjet e fondeve të ndihmës së zhvillimit të huaj mund të rinisin për një program para përfundimit të periudhës 90-ditore nëse është kryer një rishikim, dhe Sekretari i Shtetit ose i dërguari i tij, në konsultim me Drejtorin e Zyrës së Menaxhimit dhe Buxhetit, vendosin të vazhdojnë programin në të njëjtën formë ose të modifikuar”. Kjo procedurë pritet të ndiqet edhe për Shqipërinë, ku ndihma për institucionet dhe programet e caktuara mund të rifillojë, nëse ato vlerësohen në përputhje me interesat dhe politikat e Shteteve të Bashkuara.