Uragani Melissa ka mbërritur në jugperëndim të Xhamajkës duke u bërë stuhia më e fortë që ka goditur ndonjëherë kombin e Karaibeve në historinë moderne. Autoritetet kanë shpallur gjendjen e jashtëzakonshme në disa rajone, ndërsa qindra banorë janë evakuuar nga zonat bregdetare. Fillimisht një stuhi e kategorisë pesë, Melissa goditi bregdetin me erëra që tejkalonin 185 km/orë, duke shkaktuar dëme të mëdha strukturore dhe përmbytje të menjëhershme. Sipas Qendrës Kombëtare të Uraganeve, stuhia është dobësuar lehtë në kategorinë katër, por ende mbetet jashtëzakonisht e rrezikshme, me erëra që arrijnë deri në 230 km/orë. Meteorologët paralajmërojnë se deri në 76 centimetra shi mund të bien në disa zona të vendit, duke rritur rrezikun e rrëshqitjeve të dheut dhe përmbytjeve të mëdha. Pamjet që po qarkullojnë në rrjetet sociale tregojnë rrugë të përmbytura, pemë të rrëzuara dhe ndërtesa të dëmtuara rëndë. Një banor i Kingstonit i tha BBC News se “Erërat janë aq të forta sa nuk do të mund të ngriheshe në këmbë.” Stuhia pritet të mbetet e fuqishme ndërsa kalon mbi territorin e Xhamajkës dhe më pas të drejtohet drejt Kubës në orët e ardhshme.