Kryeministri në detyrë i Kosovës, Albin Kurti takohet sot takohet me komandantin e KFOR-it, gjeneralin Ozkan Ulutash, për të diskutuar hapjen e plotë të Urës së Ibrit për qarkullimin e automjeteve. Kurti shpjegoi se institucionet e Kosovës janë në komunikim të vazhdueshëm me KFOR-in, me qëllim që procesi të zhvillohet në mënyrë të qetë dhe paqësore. “Sa i përket itinerarit për hapjen e plotë të Urës së Ibrit, përkatësisht marrjen nën kontroll tërësisht nga ana e Policisë së Kosovës, ne jemi në komunikim të vazhdueshëm me KFOR-in dhe une kam një takim në Kryeministri me gjeneralin e KFOR-it, komandantin Ulutash. Pra, jemi në komunikim të përditshëm, qoftë Kryeministria, qoftë Ministria e Brendshme, në mënyrë që të shkojë gjithçka në mënyrë të qetë dhe paqësore”, tha kreu i ekzekutivit Kosovar. Ai vlerësoi se ndërtimi i urave të reja pranë Urës së Ibrit dhe qarkullimi i lirë nëpër to e kanë bërë të pakuptimtë vazhdimin e mbylljes së urës kryesore. “Pas ndërtimit të urave të reja është bërë absurde që ajo urë të mbahet e mbyllur. Fakti që qytetarët kanë qarkulluar lirshëm në këto ura të reja dhe nuk ka pasur shtim as të incidenteve, as të tensioneve, tregon se qarkullimi i njerëzve dhe mallrave, si dhe liria gjithnjë e më e madhe e lëvizjes, është e dobishme jo vetëm për ekonominë, por edhe për paqen”, u shpreh kryeministri në detyrë. Misioni i NATO-s në Kosovë, KFOR, njoftoi ditë më parë për një “tranzicion gradual” të pranisë së tij në Urën e Ibrit, edhe pse theksoi se procesi mbetet i kthyeshëm, në varësi të situatës së sigurisë. Ndërkohë, Bashkimi Evropian ka deklaruar se janë përmbushur kushtet për hapjen e urës edhe për qarkullimin e automjeteve.