Rusia ka kryer sulmin e saj më vdekjeprurës për vitin 2026 mbi Ukrainë. Bombardimet në Kiev dhe qytete të tjera vranë të paktën 17 persona, përfshirë një fëmijë 12-vjeçar, si dhe plagosën dhjetëra të tjerë. Sulmet u kryen me dronë dhe raketa, kanë raportuar zyrtarët lokalë Reagoi presidenti ukrainas, Volodymyr Zelensky, i cili tha se sulmet e pamëshirshme treguan se Rusia nuk meriton asnjë lehtësim të politikave globale apo heqje sanksionesh, ndërsa sipas tij rreth 100 persona u plagosën përveç atyre që humbën jetën. “Nuk mund të ketë normalizim të Rusisë siç është sot. Presioni ndaj Rusisë duhet të funksionojë. Dhe është e rëndësishme të përmbushet çdo premtim për ndihmë ndaj Ukrainës në kohë”, ka shtuar ai. Moska ka thënë ndërkaq, se kishte kryer një sulm “masiv” ndaj Ukrainës që kishte goditur objektiva energjetike të përdorura nga forcat ukrainase si dhe prodhimin e raketave lundruese dhe dronëve, pa dhënë detaje.