Në një konferencë për shtyp të mbajtur në Shtëpinë e Bardhë, presidenti amerikan Donald Trump deklaroi se administrata e tij nuk do të furnizojë Ukrainën me raketa me rreze të gjatë veprimi. Ai theksoi se “nuk dëshiron që këto armë të përdoren për të goditur objektiva në territorin rus, veçanërisht në Moskë”, duke theksuar rrezikun e përshkallëzimit të konfliktit. “Unë nuk jam në anën e askujt, dua që të ndalen vrasjet. Kjo është ana ku qëndroj,” u shpreh Trump, duke bërë thirrje për përmbajtje dhe zgjidhje diplomatike. Sipas gazetës The Financial Times, Kievi i ka kërkuar Uashingtonit raketa të tipit Tomahaëk, por frika se ato mund të përdoren për sulme të papërgjegjshme ka bërë që Shtëpia e Bardhë të hezitojë. Edhe administrata e mëparshme e Joe Biden kishte shprehur shqetësime të ngjashme për rrezikun që mund të sjellë përdorimi i raketave lundruese ndaj caqeve brenda Rusisë. Ndërkohë në Bruksel, Përfaqësuesja e Lartë e BE-së për çështjet e jashtme, Kaja Kallas, ngriti alarmin për përdorimin në rritje të armëve kimike nga ana e Rusisë në Ukrainë. “Rusia po intensifikon sulmet me armë kimike ndaj forcave ukrainase. Janë regjistruar mbi 9 mijë raste të përdorimit të këtyre armëve të ndaluara, sipas inteligjencës së Holandës dhe Gjermanisë,” deklaroi Kallas pas mbledhjes së Këshillit të Punëve të Jashtme të BE-së. Sipas saj, qëllimi i këtyre sulmeve është që Ukraina të detyrohet të dorëzohet. Ajo shprehu zhgënjim për dështimin në arritjen e një marrëveshjeje për paketën e 18-të të sanksioneve ndaj Rusisë, duke theksuar se “tani topi është në fushën e Sllovakisë”, ndërsa ministri i Jashtëm i Polonisë, Radoslaë Sikorski, bëri thirrje që pyetjet për bllokimin e marrëveshjes t’i drejtohen Hungarisë dhe Sllovakisë.