Ukraina i përgjigjet agresionit rus me një tjetër operacion të fuqishëm. Këtë të martë, Shërbimi i Sigurisë së Ukrainës njoftoi se ka goditur me eksplozivë nënujorë urën kyçe që lidh Rusinë me Gadishullin e Krimesë, të pushtuar nga Moska. Ky është sulmi i radhës, vetëm dy ditë pas një vale sulmesh me dronë në territorin rus, si pasojë e së cilës u dëmtuan dhjetëra bombardues rusë me rreze të gjatë veprimi. Shërbimi i Sigurisë së Ukrainës tha se operacioni i sotëm ka rezultuar në vendosjen e gjithsej 1.100 kilogramëve eksplozivë në bazamentet mbajtëse të urës në Ngushticën e Kërçit. Ura 19 kilometra e gjatë e Krimesë, e cila mundëson trafik rrugor dhe hekurudhor, u ndërtua nga Rusia dhe u hap në vitin 2018 – katër vjet pas aneksimit të paligjshëm të Gadishullit nga Moska – dhe shërben si rrugë furnizimi për forcat ruse që mbajnë të pushtuara pjesë të jugut të Ukrainës. Kjo urë është dëmtuar nga sulmet ukrainase edhe në tetor të vitit 2022 dhe në korrik të vitit 2023 dhe është mbyllur disa herë për shkak të incidenteve të sigurisë. “Asnjë objekt rus i paligjshëm nuk ka vend në territorin e shtetit tonë. Prandaj, ura e Krimesë është një objektiv plotësisht legjitim, veçanërisht duke pasur parasysh se armiku e përdorte si rrugë logjistike për furnizimin e trupave të tij”, tha kreu i Shërbimit të Sigurisë së Ukrainës, Vasyl Malyuk, duke theksuar se nga shpërthimi nuk ka pasur viktima.