Rusia intensifikoi sulmet ndaj Ukrainës, ku gjatë 24 orëve të fundit u raportua për të paktën 24 të vrarë, mes të cilëve edhe tre fëmijë. Moska goditi me një raketë X-101 një ndërtesë në Kiev, duke e shkatërruar totalisht, ku nga rrënojat, mes 24 viktimave, u nxorën edhe tre vajza 12 dhe 15 vjeçe. Në vendngjarje mbërriti edhe presidenti ukrainas, Volodymyr Zelensky, i cili tha se rusët po shkatërrojnë qëllimisht jetë njerëzish, teksa iu kërkoi ndërkombëtarëve të ushtrojnë presion. Zelensky paralajmëroi hakmarrje pas goditjeve vdekjeprurëse të Rusisë, teksa tha se Ukraina është plotësisht e justifikuar për të planifikuar sulme ndaj objektivave energjetike dhe ushtarake ruse. “Ukraina do të godasë industrinë e naftës në Rusi, prodhimin e tyre ushtarak dhe ata që janë përgjegjës për kryerjen e krimeve të luftës kundër Ukrainës dhe qytetarëve të saj”, deklaroi Zelensky.