Shtabi i Përgjithshëm i Ukrainës ka mohuar kategorikisht pretendimet e presidentit rus, Vladimir Putin se trupat ukrainase në Kursk janë të rrethuar nga forcat ruse, duke i quajtur ato “të rreme”. Sipas një deklarate të ushtrisë ukrainase, njësitë janë tërhequr në pozicione “më të favorshme”, ndërkohë që nuk ka rrezik për rrethim. Shtabi i Përgjithshëm theksoi se “raportet për rrethimin e supozuar të trupave ukrainase në rajonin e Kurskut nuk korrespondojnë me realitetin dhe janë fabrikuar nga pala ruse për qëllime politike dhe për të ushtruar presion mbi Ukrainën dhe aleatët e saj”. Deklarata thekson se situata nuk ka treguar ndonjë ndryshim të rëndësishëm gjatë ditës, ndërsa luftimet vazhdojnë në zonën operacionale të grupit ushtarak ukrainas në Kursk. Në të njëjtën kohë, forcat ukrainase janë rigrupuar dhe vazhdojnë të zmbrapsin sulmet ruse, duke i shkaktuar humbje të konsiderueshme armikut. Që nga orët e para të ditës, 13 përleshje kanë ndodhur në rajonin e Kurskut, teksa Kievi pretendon se “nuk ka kërcënim për rrethim të njësive ukrainase”.