Ukraina publikoi pamjet e manovrave të artilerisë së saj në Rivne, pranë kufirit me Bjellorusinë. Zhvillimi vjen në një kohën kur Rusia ka njoftuar mbylljen e manovrave ushtarake në Krime dhe tërheqjen e forcave nga kufijtë e Ukrainës. Kremlini mohoi gjithashtu akuzat e një sulmi kibernetik ndaj Ukrainës, e cila tha një ditë më parë se faqet e internetit të ministrisë së mbrojtjes dhe dy bankave ishin sulmuar. "Ne nuk dimë asgjë. Siç pritej Ukraina vijon të fajësojë Rusinë për gjithçka," tha për gazetarët zëdhënësi i Kremlin, Dmitry Peskov. Sulmet kibernetike kishin përfshirë bankën shtetërore Oshadbank dhe dy institucione të mëdha financiare. Shërbimet kishin rinisur punë të mërkurën ndërsa faqja e minsitrisë së mbrojtjes mbetej ende gjysmë funksionale. Grupet vëshguese të Ukrainës bënë përgjegjës Moskën. "Nuk mund të përjashtohet fakti që agresori përdor hile të ulëta”, thanë autoritetet ukrainase duke iu referuar Moskës. Pas një sulmi të tillë në janar NATO njoftoi një marrëveshje mbrojtjeje kibernetike me Kievin. Bashkimi Evropian tha gjithashtu se po mobilizonte burimet e saj në ndihmë të sigurisë kibernetike të Ukrainës.