Kryeministri i Norvegjisë njoftoi nga Kievi se vendi i tij do të akordojë një paketë financiare prej 9 miliardë dollarësh për Ukrainën vitin e ardhshëm. Ky premtim u bë gjatë një mbledhjeje të udhëheqësve të vendeve baltike dhe nordike në kryeqytetin ukrainas, në një shfaqje të fortë të solidaritetit ndërkombëtar. Jonas Gahr Støre saktësoi se pjesa dërrmuese e kësaj shume do të shkojë për të mbështetur ushtrinë e Ukrainës në vijën e frontit.Ky njoftim vjen përpara një takimi kyç që do të mbahet të hënën në Kiev nga "Koalicioni i të Gatshmëve" një iniciativë e udhëhequr nga Franca dhe Britania e Madhe. Fokusi i këtij samiti do të jetë rritja e presionit diplomatik dhe ekonomik ndaj Rusisë, si dhe gjetja e mënyrave për të përshpejtuar ndihmën ushtarake përpara fillimit të muajve të ftohtë të dimrit, kur Moska pritet të shënjestrojë sërish rrjetin energjetik.Pavarësisht ndihmës bujare nga Oslo, situata financiare e Ukrainës mbetet në pikën më kritike që nga fillimi i pushtimit rus në vitin 2022. Presidenti Volodymyr Zelensky deklaroi të dielën se ushtria e tij po përballet aktualisht me një deficit prej 27 miliardë dollarësh. Për të mbuluar këtë boshllëk financiar, Zelensky i bëri thirrje zyrtare Bashkimit Evropian që të lëvrojë para kohe një pjesë të kredisë së premtuar prej 90 miliardë eurosh. Udhëheqësi ukrainas tha se pa një injektim emergjent prej të paktën 10 miliardë dollarësh deri në fund të këtij viti, ushtarët në front nuk do të kenë municione dhe armatime të mjaftueshme për të vazhduar rezistencën ndaj ushtrisw ruse.