Banorët e fshatit Burimas në Maliq protestuan duke bllokuar punimet e nisura për ndërtimin e linjës së ujësjellësit që do të lidhë fshatrat Zvezdë dhe Burimas. Sipas tyre, ndërtimi i një pusi që bën të mundur furnizimin me ujë të pijshëm për të gjitha familjet e fshatit është arritur pas shumë vite pritje dhe peripecish, ndërsa projekti i ri po zbatohet pa një konsultim paraprak me ata. Shqetësimi kryesor për banorët është rreziku që ata të përballen përsëri me mungesën e ujit të pijshëm. Pas reagimit të banorëve, përfaqësues të ujësjellësit tentuan të bisedojnë me ta për t’i informuar se projekti parashikon ndërtimin e një linje të përbashkët lidhëse midis fshatrave Zvezdë, dhe Burimas, pa cenuar furnizimin me ujë të këtij të fundit, pasi edhe në Zvezdë është ndërtuar një tjetër pus për të plotësuar nevojat e banorëve. Linja e re synon të bashkojë burimet ujore të dy fshatrave për raste emergjente.