Udhëheqësit arabë uruan menjëherë Presidentin e zgjedhur Donald Trump për fitoren në zgjedhjet presidenciale amerikane. Disa prej tyre thonë se shpresojnë që ai do t’u japë fund konflikteve aktuale në Lindjen e Mesme, ndërsa të tjerët thonë se presin një qëndrim më të ashpër ndaj Iranit. Mbreti Salman i Arabisë Saudite dhe Princi i kurorës Mohammed bin Salman, udhëheqësit e Emirateve të Bashkuara Arabe, Emiri i Katarit Sheik Tamim bin Hamad, uruan Presidentin e zgjedhur Donald Trump për fitoren, duke theksuar rëndësinë e forcimit të partneriteteve strategjike. Bin Salman ka theksuar se shteti i tij nuk do të shqyrtojë përmirësimin e marrëdhënieve me Izraelin nëse nuk i jepet fund luftës në Gazë dhe nëse nuk krijohet shteti palestinez. Shtetet e pasura të Gjirit i kanë forcuar lidhjet me Iranin dhe i ka dhënë garanci Republikës Islamike se nuk do ta lejojnë Izraelin të shfrytëzojë hapësirën e tyre ajrore për sulme ndaj Iranit. Irani e minimizoi rezultatin e zgjedhjeve amerikane, duke thënë se është i gatshëm për një konfrontim me Izraelin. Mbreti i Jordanisë, udhëheqësi i Egjiptit, kryeministri në detyrë i Libanit, të cilët janë të angazhuar në negociatat për t’u dhënë fund konflikteve aktuale, gjithashtu e uruan Trump.