Top Channel/ U “tradhëtua” nga faturat, si ra FBI në gjurmët e autorit të rrjedhjes së dokumenteve!

Faturat e paguara në një platformë të mediave sociale në internet dhe intervistat me një përdorues tjetër ndihmuan FBI-në të identifikonte anëtarin e Gardës Kombëtare Ajrore në Masaçusets si të dyshuarin për rrjedhjen e dokumenteve ushtarake shumë të klasifikuara. Detaje të reja kanë dalë në dritë nga hetimi një javor, në vazhdën e të cilit u zbulua 21 vjeçari Jack Teixeira, që doli një ditë më parë në gjykatë për t'u përballur me akuzat në bazë të Ligjit për Spiunazhin për marrjen dhe mbajtjen e paautorizuar të informacioneve të klasifikuara dhe të mbrojtjes kombëtare. Ai do të mbahet në arrest deri në seancën e paraburgimit javën e ardhshme. Dokumentet e publikuara prej tij në platformën Discord e të shpërndara prej andej edhe në media të tjera sociale ekspozuan para botës informacione secrete mbi luftën në Ukrainë, aftësitë dhe interesat gjeopolitike të vendeve të tjera dhe çështje të tjera të sigurisë kombëtare. Por Teixiera u përshkrua më shumë si një “mburravec” sesa si spiun. "Kemi të bëjmë me një 21 vjeçar, që donte të shiste mend para shokëve dhe jo me cyber-spiunët e Pekinit apo Rusisë", tha për CNN Jim Himes, anëtar i komisionit parlamentar për shërbimet sekret amerikane . "Kemi shumë punë përpara, për të riparuar këtë sistem, që lejon herë pas here që të rrjedhin informacione," shtoi ai. Nga hetimi rezultoi se Teixeira fillimisht i shtypte në kopje të reja dokumentet por më pas i mori në shtëpi për t'i fotografuar, sepse ai "ishte i shqetësuar se mund të zbulohej duke bërë transkriptimet e tekstit në vendin e punës".