Komisioni për Parandalimin e Korrupsionit në Maqedoninë e Veriut njoftoi se ka ndërmarrë që në 2019-tën një nismë për hetimë kryetarit të Komunës së Strugës, Ramiz Merko, i cili u përcaktua nga Departamenti amerikan i Shtetit si “persona non grata” për shkak të veprave korruptive dhe ndikimit në gjyqsor. Struktura antikorrupsion në Shkup thekson një sërë parregullsishë në punën e Merkos, ndërsa hedh dyshime mbi punën e Prokurorisë, Gjykatës Komunale dhe Këshillit Gjyqësor sa i takon tolerimeve të bëra atij. Përcaktimi nga Departamenti i Shtetit për kryetarin e Komunës së Strugës, Ramiz Merko si "persona non grata" vijon të jetë temë kryesore debatesh në opinionin publik në Maqedoninë e Veriut, me kërkesat e shtuara jo vetëm të opozitës për largimin e tij nga posti, por edhe me ballafaqimin me drejtësinë. Sipas Komisionit për Parandalimin e Korrupsionit, nisma e tij për hetime në 2019-tën ka humbur në sirtaret e Prokurorisë Themelore në Strugë dhe të Këshillit Gjyqësor. Kryetarja e këtij komisioni, Biljana Ivanovska u shpreh se kreu i Strugës ka vepruar në kundërshti me vullnetin e Këshillit Komunal dhe se i ka shkaktuar dëme buxhetit gjatë prokurimeve publike për përfitime personale.“Këshilli Komunal nuk ka marrë një vendim të posaçëm për furnizimin e komunës me automjete në vitin 2018, ndërsa janë bërë lëshime proceduriale dhe gjatë debatit për ribalancimin e buxhetit të komunës nuk është diskutuar fare për blerjen e automjeteve për nevojat e komunës, megjithatë ato janë blerë më pas. Komuna që nga viti 2010 punonte me llogari të bllokuar bankare në kohën e blerjeve dhe furnizimeve me automjete luksoze, theksoi ajo.