Njëri prej trafikantëve më të mëdhenj të drogës në Kolumbi, Dario Antonio Usuga, i njohur ndryshe si "Otoniel", është i lidhur me kriminelët në ballkan, shkruan e përditëshmja kolumbiane “Semana”. Lajmi i arrestimit të liderit të kartelit të dhunshëm Clan del Golfo bëri shumë shpejt xhiron e botës, dhe duke cituar të dhënat e policisë lokale, gazeta tregon lidhjet e tij me trafikantët ballkanas.”Me qëllimin ta shtrinte sa më shumë rrjetin e tij të tregtisë së paligjshme të narkotikëve, Otoniel kishte krijuar lidhje ndërkombëtare në Panama, Meksikë, Republikën Domenikane, Belgjikë e Ballkan”, thotë “Semana”. Otoniel u prangos në xhungël, gjatë një operacioni të përbashkët të ushtrisë, forcave ajrore dhe policisë. Qeveria vendase kishte ofruar 800,000 dollarë shpërblim për informacionet rreth vendndodhjes së tij, ndërsa Shtetet e Bashkuara kishin vendosur mbi kokën e kryetrafikantit një shpërblim prej pesë milionësh. Presidenti kolumbian Iván Duque e përshkroi kapjen e tij si “goditjen më të madhe kundër trafikimit të drogës në vendin prej dekadash. “ Kjo goditje mund të krahasohet vetëm me rënien e Pablo Escobarit në vitet 90”, ka thënë ai. Sipas shefit të policisë, Jorge Vargas, lëvizjet e Otoniel që nuk përdorte as celular për të mos u gjurmuar, u diktuan përmes imazheve satelitore. Në përpjekjet për gjetjen e 50 vjecarit u përfshinë edhe agjenci të Mbretërisë së Bashkuar dhe SHBA-së.