Të arrestohesh sepse në makinë policia të gjen një tufë me çaj mali, e kujton se ti je përdorues kanabisi. Kjo i ka ndodhur një emigranti shqiptar, në Angli kur fugoni i tij u ndalua për një kontroll të rastësishëm, por të pa mësuar me erën e çajit të malit, policët anglezë mbase ndonjëri prej tyre edhe përdorues, ka kujtuar se kemi të bëjmë me një tufë kanabisi, gati për ta ndezur. Histori e 53-vjeçarit Agim Agaj është pasqyruar nga tabloidi britanik The Sun, i shquar për mënyrën e titujve me të cilët luan shpesh. Për këtë ngjarje, gazetari Ed Southgate ka zgjedhur si titull CHARCOS, si për ta përafruar ngjarjen me trafikantët e drogës, që njihen si Narcos, por në fakt e gjitha puna e tyre në zbulimin e narcosit shqiptar rezultoi në një turp të vërtetë. I intervistuar nga The Sun, Agim Agaj tregoi me detaje ngjarjen. “Ishin dy policë. Një hapi derën e fugonit dhe pa se kisha një enë plastike dhe i tha policit tjetër se unë kisha kanabis. I thashë që nuk është drogë, por çaj mali. Nuk më dëgjuan dhe më arrestuan. Çaji nuk duket aspak si kanabis dhe nuk e ka erën si të saj. Edhe një fëmijë mund të bëjë dallimin mes çajit dhe kanabisit”, rrëfen emigranti shqiptar. Gazetarët e The Sun nuk e kanë lënë me kaq, kanë marrë edhe një prononcim nga forca policore në Dorset, e cila u morr me hetimin e këtij rasti. Një zëdhënës i policisë për këtë ngjarje, të cilën The Sun e trajton si injorancë dhe turp të policëve. Ai deklaroi se u krye një kontroll i automjetit dhe u raportua se u gjet një enë plastike me disa bimë dhe oficerët menduan se ishte drogë. Pas hetimeve të mëtejshme u konfirmua se lënda që u gjet nuk ishte drogë ilegale dhe burri u lirua pa asnjë akuzë|. Pamjet: AFP