Avokati Sokol Mëngjesi ka dalë nga koma pas 15 ditësh. Ai u dhunua nga tre persona më 29 maj në rrugën “Pjetër Bogdani”, pasi la fëmijën në kopsht. Familjarët njoftojnë se mjekët e nxorrën avokatin nga koma të enjten mëngjesin. Ai ndodhet aktualisht në një nga spitalet e Athinës, ku u dërgua me avion sanitar disa ditë pas ngjarjes me kërkesë të familjarëve, që kërkuan trajtim të specializuar për të. Avokati u godit me dorezë metalike nga tre persona. Nga 4 autorët e dyshuar të sulmit, ku 3 goditën avokatin dhe njëri i transportoi, në pranga ka rënë vetëm një. Dorian Aliaj, pasi u vetëdorëzua dëshmoi para grupit hetimor. Sipas tij, ai dhe Drivald Alia, Elton Kasaj dhe Romario Tabaku nuk e kishin planifikuar sulmin ndaj avokatit. Nga ana tjetër i ndaluari me iniciativë të policisë, Dritan Nano, i cili dyshohet si organizator i sulmit ndaj avokatit për motive pronësie, ka mbajtur qëndrim mohues duke e përjashtuar veten nga kjo ngjarje.