Ish-presidenti Ilir Meta ka reaguar sërish nga burgu “313”, teksa pretendon se provat që SPAK pretendon se janë të tijat, janë në telefonin e Kryemadhit dhe grupit të saj të ngushtë. Në një postim në Facebook ai shkruan se i gjithë ky procesi i rrëmbimi politik dhe veprimet e paligjshme nga Prokuroria, Policia dhe Gjykata kanë vetëm një qëllim politik, izolimin e paligjshëm ekstrem të tij, si President i Partisë së Lirisë. Teksa e quan arrestim “banditesk”. Meta shton se e gjithë procesi hetimor është bazuar në montime politike, dëshmitarë të rremë e me probleme me drejtësinë. “Sipas videove të publikuara dhe dëshmitarëve okularë, më 21 Tetor, disa makina private pa asnjë mbishkrim policor rrethuan makinën ku unë lëvizja dhe dhjetëra njerëz me maska dhe armatim të rëndë bllokuan trafikun në autostradë, prangosën dhunshëm drejtuesin e automjetit, Artimis Peca, funksionar politik i Partisë së Lirisë (pa asnjë vendim gjyqësor deri tani), ndërsa unë, Ilir Meta, u rrëmbeva me dhunë dhe u tërhoqa zvarrë nga automjeti mes publikut, me një trajtim kriminal e degradues pa m’u komunikuar asnjë vendim gjyqësor dhe pa m’u lexuar të drejtat, që më takojnë, sipas Kushtetutës. Në dy deklarata, SPAK dhe BKH mohuan që të kenë bërë ekzekutimin e vendimit të GJKKO, ndërsa policia pranoi se e kishte kryer ajo ekzekutimin. Asnjë provë nuk është publikuar nga policia se janë respektuar qartë procedurat ligjore, që janë përcaktuar në nenin 28 të Kushtetutës. Neni 28/1 i Kushtetutës, parashikon se: “1. Kushdo, të cilit i hiqet liria, ka të drejtë të njoftohet menjëherë në gjuhën që ai kupton, për shkaqet e kësaj mase, si dhe për akuzën që i bëhet. Personi, të cilit i është hequr liria, duhet të njoftohet se nuk ka asnjë detyrim të bëjë ndonjë deklaratë dhe ka të drejtë të komunikojë menjëherë me avokatin, si dhe t’i jepet mundësia për realizimin e të drejtave të tij.”