Tymi i parë i zi u ngrit nga oxhaku i Kapelës Sistine mbrëmjen e së mërkurës, duke sinjalizuar se kardinalët ende nuk kanë arritur një marrëveshje për zgjedhjen e Papës së ri. Pas më shumë se tre orësh mbledhjeje në Konklavën që nisi pasdite vonë, 133 kardinalët zgjedhës nuk dolën me një emër që të sigurojë dy të tretat e votave të nevojshme për t’u bërë kreu i ri i Kishës Katolike. Takimi i parë i konklavës nisi rreth orës 17:30, pasi dyert e Kapelës Sistine u mbyllën me frazën tradicionale “extra omnes” (“të gjithë jashtë”), dhe përfundoi rreth orës 21:00. Rreth kësaj kohe, tymi i zi filloi të dalë nga oxhaku, me një vonesë prej afro dy orësh krahasuar me pritshmëritë. Burime pranë Vatikanit kanë theksuar disa arsye për këtë vonesë, përfshirë kohëzgjatjen e meditimit të mbajtur nga Kardinali Raniero Cantalamessa, që zgjati 45 minuta, si dhe faktin që shumica e kardinalëve janë për herë të parë pjesëmarrës në një konklavë dhe nuk zotërojnë mirë gjuhën italiane. Votimi i radhës pritet të zhvillohet të enjten, me katër raunde të planifikuara: dy në mëngjes dhe dy në pasdite.