Dhoma e Përfaqësuesve në SHBA miratoi ligjin për rritjen e tavanit të borxhit federal, në bazë të marrëveshjes së vulosur më në fund mes Presidentit Joe Biden dhe Kryetarit republikan të kësaj dhome, Kevin McCarthy. Ligji, i cili u aprovua me 314 vota pro dhe 117 kundër, tani duhet të marrë dhe dritën jeshile të se Senatit, përpara se të firmoset nga shefi i Shtëpisë së Bardhë. Biden dhe McCarthy u angazhuan maksimalisht për të siguruar mbështetje për miratimin e ligjit për rritjen e tavanit të borxhit, që përfshin edhe shkurtimet buxhetore të kërkuara nga republikanët. Sekretarja e Thesarit Janet Yellen dha alarmin javën që shkoi duke thënë se Kongresi duhet të rrisë kufirin e borxhit deri më 5 qershor, ose përndryshe qeveria nuk do të jetë në gjendje të përmbushë detyrimet e saj financiare. Sipas saj, edhe pritja deri në minutën e fundit mund të dëmtojë seriozisht besimin e biznesit dhe të konsumatorëve dhe të ndikojë negativisht në vlerësimin e kreditit të vendit. Ligji përfshin heqjen e kufirit ekzistues të huamarrjes deri në janar të vitit 2025 dhe një marrëveshje buxhetore dyvjeçare, që i mban shpenzimet federale të pandryshuara në vitin 2024 dhe i rrit ato me 1% në vitin 2025. Pjesë të tjera përfshijnë një pakësim të numrit të agjentëve të rinj që do të punësojë agjencia e grumbullimit të taksave, një kërkesë që shtetet të kthejnë 30 miliardë dollarë ndihma të pashpenzuara të marra për pandeminë e koronavirusit nga qeveria federale dhe rritjen nga 50 në 54 vjeç, për grupmoshat që duhet të punojnë, që të kualifikohen për ndihma ushqimore. Pamjet: AFP