Numri i të plagosurve nga tërmeti që goditi Stambollin ka arritur në 151 persona, sipas zyrës së guvernatorit të qytetit. Të lënduarit janë kryesisht persona që janë hedhur nga ballkonet apo dritaret në përpjekje për të shpëtuar, për shkak të panikut të shkaktuar nga tërmetet. Zyrtarët konfirmojnë se nuk janë regjistruar viktima dhe asnjë ndërtesë banimi nuk është shembur. Megjithatë, një ndërtesë e braktisur në lagjen Fatih është rrëzuar si pasojë e lëkundjeve. Furnizimi me energji elektrike dhe gaz, si dhe infrastruktura për ujë të pijshëm dhe kanalizime, ka mbetur i paprekur, sipas deklaratave zyrtare. Ministri i Arsimit ka njoftuar se shkollat në Stamboll do të qëndrojnë të mbyllura të enjten dhe të premten. Ai shtoi se nuk është raportuar asnjë incident serioz në ambientet shkollore, ndërsa oborret e shkollave do të qëndrojnë të hapura për publikun, duke u shërbyer si hapësira të sigurta në rast nevoje. Pas tërmetit kryesor me magnitudë 6.2, i cili ndodhi rreth shtatë kilometra nën tokë dhe zgjati për 13 sekonda, janë regjistruar gjithsej 51 pas-goditje. Më e forta prej tyre kishte një magnitudë prej 5.9 ballë, sipas Ministrit të Brendshëm.