Turizmi shqiptar e nisi vitin me këmbë të mbarë. Vendi ynë shënoi një rekord të ri turistik në muajin janar me gati gjysmë milionë vizitorë që vizituan vendin. Shifra është 30% më e lartë krahasuar me vitin rekord të 2023-it dhe 2.5 herë më e lartë se 2022-ishi. Këto numra konfirmojnë edhe pritshmëritë e mira të tur-operatorëve, të cilët prej kohesh shprehen se kontratat e rezervimeve janë rritur me 40% më shumë se një vit më parë. Me këtë nisje të vitit, Shqipëria është tashmë në rrugën e mbarë për të thyer rekordin e 10.1 milionë turistëve që erdhën në vendin tonë gjatë vitit të kaluar, ndërsa vendi shkon gjithnjë e më shumë drejt turizmit gjithëvjetor. Shqipëria është bërë një destinacion viral dhe është rregullisht pjesë e mediave kryesore botërore që promovojnë plazhet dhe bukuritë e saj natyrore edhe në dimër.