Katër turistë të huaj rrezikuan jetën në det, pasi mjeti lundrues me të cilin po udhëtonin u përfshi papritur nga flakët në mes të detit. Salla operative ka marrë një njoftim urgjent se një mjet lundrues kishte pësuar një defekt të rëndë dhe zjarri kishte shpërthyer me shpejtësi në pjesën e brendshme të tij, duke bllokuar personat në bord. Efektivët e Policisë Detare, të cilët ndodheshin në atë moment në patrullim përgjatë hapësirës ujore të zonës, u nisën menjëherë drejt koordinatave të dhëna. Falë koordinimit dhe ndërhyrjes së shpejtë, mjeti që po digjej në afërsi të Pemës së Thatë u lokalizua brenda pak minutash. Policia bëri të mundur evakuimin e menjëhershëm të katër shtetasve gjermanë nga skafi në flakë, duke i hipur ata në mjetin e policisë. Turistët u transportuan të sigurt drejt bregut dhe fatmirësisht janë në gjendje të mirë shëndetësore, pa pësuar asnjë dëmtim fizik apo djegie. Ndërkohë një grup hetimor po vijon punën për të përcaktuar shkakun teknik të rënies së zjarrit në mjet.