Një person humbi jetën e disa të tjerë u plagosën kur avioni i Singapore Airlines me të cilin udhëtonin u godit nga turbulenca të forta. Boeing 777-300ER i nisur nga Londra drejt Singaporit bëri më pas ulje të detyruar në Bangkok. Të dhënat e gjurmimit të fluturimeve tregojnë se avioni ra 2000 m brenda pak minutash pasi kaloi Gjirin e Bengalit. Në bordin e tij kishte gjithsej 211 pasagjerë dhe 18 anëtarë të ekuipazhit, thuhet në deklaratën e lëshuar nga kompania ajrore, sipas të cilës po punohet aktulisht me autoritetet tajlandeze për të ofruar ndihmë mjekësore për pasagjerët e dëmtuar. Ende nuk është fort e qartë se cfarë ndodhi në avion. Një pasagjer i tha agjencisë së lajmeve Reuters se mjeti fluturues papritmas filloi "të anohej fort e po dridhej". "Pati papritur një rënie shumë dramatike, kështu që ata që ishin ulur dhe nuk e kishin vendosur rripin e sigurimit u përplasën menjëherë në tavan”, rrëfeu studenti 28-vjeçar Dzafran Azmir. "Disa persona goditën kokën tek mbajtëset e bagazheve sipër, të tjerë u përplasën me vendet ku janë dritat e maskat”, shtoi ai. Turbulencat ajrore shkaktohen më të shumti kur avionët fluturojnë nëpër re, por ato ndodhin edhe një kohë të kthjellët e ajër të pastër e kështu nuk janë të dallueshme në radarin e avionit dhe as nuk mund të parashikohen. “Dëmtimet nga turbulencat e rënda janë relativisht të rralla në kontekstin e miliona fluturimeve të kryera. "Megjithatë, turbulencat e rënda mund të jenë dramatike dhe të çojnë në lëndime të rënda ose fatkeqësisht si në këtë rast një fatalitet," tha eksperti i aviacionit John Strickland për BBC. “Jo më kot, shtoi ai, linjat ajrore rekomandojnë mbajtjen e rripave të sigurimit gjatë një fluturimi, jo vetëm të gjatë, por edhe të shkurtër.