Mijëra tunizianë dhe punonjës sindikatash dolën në protestë ndaj kushteve të rënda ekonomike si dhe për arrestimin e një zyrtari të shoqatave të punëtorëve. Qeveria atje po kërkon një hua nga FMN por federata e punëtorëve paralajmëron se kjo do të sjellë masa akoma më të rënda shtrëngimi ekonomik. Demonstruesit në qytetin Sfax, ku u zhvillua dhe protesta më e madhe, brohorisnin "Tunizia nuk është për t’u shitur!" si dhe "Jo heqjes së subvencioneve!" Disa protestues ngrinin franxholla buke në ajër si protestë për kostot në rritje. Ata kërkonin gjithashtu lirimin e zyrtarit sindikal Anis Kaabi, i arrestuar dy javë më parë gjatë një greve të punonjësve të autostradave. Zyrtari sindikal Othmane Jallouli, u tha demonstruesve se "qeveria kishte dështuar me reformat sociale e ekonomike, por ia kishte dalë vetëm për të sulmuar sindikatat”.Protestat vijnë një vit e gjysmë pasi presidenti tunizian Kais Saied shkarkoi qeverinë dhe mori të gjithë pushtetin, në lëvizje që opozitarët e kanë quajtur grusht-shteti.Tunizia është një vend i varur nga importet dhe ka shënuar mangësi të konsiderueshme të mallrave bazë si sheqeri apo nafta.