KFOR, konfirmoi për Radion Evropa e Lirë se i ka mbërritur një kërkesë nga Serbia lidhur me dislokimin e deri 1.000 trupave ushtarake dhe policore serbe në Kosovë.“ Jemi duke e shqyrtuar aktualisht një pretendim të tillë”, thuhet në përgjigjen e misionit të NATO-s në Kosovë, që shton se “ mbtete jashtëzakonisht vigjilent dhe plotësisht i aftë të përmbushë detyrën e ngarkuar nga Kombet e Bashkuara”. Një ditë më parë, autoritetet në Serbi bënë të ditur se kanë vendosur që t’i drejtohen KFOR-it me kërkesë për dislokimin e trupave në Kosovë, edhe pse, sic tha presidenti Aleksandar Vuçiq, është e qartë se kërkesa e tyre do të refuzohet. Serbia e ngriti këtë pretendim duke u bazuar sipas saj në Rezolutën 1244 të Këshillit të Sigurimit të Kombeve të Bashkuara, në një kohë kur tensionet mes Kosovës dhe Serbisë janë përshkallëzuar ndjeshëm këto ditët e fundit. Rezoluta 1244, e miratuar në vitin 1999, ofroi një kornizë për zgjidhjen e konfliktit në Kosovë, duke autorizuar vendosjen e një pranie ndërkombëtare, civile dhe ushtarake. Ajo themeloi një administratë ndërkombëtare tranzitore dhe mbikëqyri tërheqjen e forcave ushtarake serbe nga Kosova. Ish-zyrtari i NATO-s, Jamie Shea, tha se është i bindur se Serbisë nuk do t’i aprovohet kërkesa për kthimin e ushtarëve dhe policëve në Kosovë, megjithatë u shpreh i kënaqur që të paktën Beogradi ka vendosur të bëjë kërkesë dhe jo të veprojë në mënyrë te njeanshme.