Pamja në Ahmedabad pas përplasjes së avionit të pasagjerëve të Air India pak pas ngritjes është tronditëse. Disa orë pas aksidentit, tymi mund të shihet ende duke u ngritur nga rrënojat e ndërtesave në vendin e ngjarjes. Fotot tregojnë një kornizë krevati të djegur të hedhur në rrugë. Të gjithë po vrapojnë, duke u përpjekur të shpëtojnë sa më shumë jetë kur BBC mbërrin në vendngjarje. Zjarrfikësit shihen duke ecur përmes tokës së djegur, duke u përpjekur të shuajnë mbetjet që ende tymosin me zorrët e tyre të ujit. Ambulancat janë gjithandej në zonë. Rrugët janë të bllokuara. Në periferi, njerëz të afërmit e të cilëve po udhëtonin drejt Londrës kanë filluar të mblidhen. Avioni i prodhuar nga Boeing u rrëzua pak pas ngritjes të enjten pasdite me orën lokale, me destinacion aeroportin London Gatëick. Në bord ndodheshin 242 persona, kryesisht shtetas indianë, por edhe shumë britanikë, disa portugezë dhe një kanadez. Banorët e qytetit perëndimor indian dëgjuan fillimisht një zhurmë të madhe, pastaj panë tym të zi duke u ngritur drejt qiellit. “Isha në shtëpi kur dëgjuam një zhurmë të madhe,” i tha një dëshmitar okular. Një tjetër banor i zonës tha “Kur dolëm jashtë për të parë çfarë kishte ndodhur, kishte vec shtëllunga tymi. Kur erdhëm këtu, trupa të pajetë dhe mbetje nga avioni i përplasur ishin të shpërndara gjithandej.” Avioni ra mbi një konvikt mjekësh pranë Spitalit Civil, vetëm pak larg nga aeroporti. “Avioni ishte në flakë. Ne ndihmuam njerëzit të dilnin nga ndërtesa dhe dërguam të plagosurit në spital.”, u shpreh një i ri indian.