Donald Trump tregon një anë tjetër të tij: Presidenti i SHBA-së, publikoi në platformën Truth Social një imazh të vetes, të përpunuar me AI, ku shfaqet duke mbajtur një armë dhe duke veshur syze dielli aviatori, shoqëruar me një paralajmërim për Iranin. “Jo më zoti Djalë i Mirë”, ishte mbishkrimi në imazh ku shfaqet flamuri amerikan dhe pamje shpërthimesh. Më herët, ai ishte ankuar se Republika Islamike nuk po merr masa. “Ata nuk dinë si të nënshkruajnë një marrëveshje jo-bërthamore. Më mirë të bëhen të zgjuar së shpejti!”, ishte mesazhi i tij. Postimi erdhi në një kohë kur bisedimet për fundin e luftës, kanë mbetur në vendnumëro. Irani pritet të paraqesë në ditët e ardhshme një propozim të rishikuar, i cili do t`i dorëzohet ndërmjetësuesve në Pakistan. Shefi i Shtëpisë së Bardhë e ka bërë të qartë se nuk do ta pranonte një variant të mëparshëm të marrëveshjes, që sugjeronte rihapjen e Ngushticës së Hormuzit dhe pretendonte po kështu që cështjet e lidhura me programin bërthamor të Teheranit, të liheshin për më vonë. Më herët ndërkohë, Trump u përball me një shaka shpotitëse të mbretit Charles, i cili nuk e la pa ia kthyer përgjigjen komenteve të presidentit amerikan se aleatët europianë shfrytëzojnë mbrojtjen që SHBA-ja u ofron që nga Lufta e Dytë Botërore.