Donald Trump hyn në presidencialet e 5 nëntorit në SHBA me një telash më pak. Shpallja e aktgjykimit kundër tij për atë që përshkruhet si rasti penal i blerjes së heshtjes, është shtyrë që të bëhet pas përfundimit të zgjedhjeve. Gjykatësi Juan Merchan e justifikoi vendimin e tij me argumentin se shtyrja e dhënies së dënimit për në 26 nëntor, u bë ndër të tjera edhe për shkak të “kornizës së veçantë kohore në të cilën kjo çështje gjen veten”.Avokatët e kandidatit republikan për president, kishin përdorur disa manovra ligjore për të arritur vonesat në dhënien e vendimit, që ishte parashikuar fillimisht të ndodhte në 18 shtator. Trumpi u shpall fajtor në maj nga një gjykatë në Nju Jork për të gjitha 34 akuzat me të cilat përballej për falsifikimin e regjistrave biznesore të kompanisë, duke u bërë presidenti apo ish-presidenti i parë amerikan që dënohet për vepër penale. Ai mund të dënohet deri me katër vjet burgim, por gjykatësi Merchan e ka mundësinë që ta ndëshkojë edhe vetëm me gjobë, dënim me kusht, apo dënim të shkurtër me burgim. Trumpi nuk ka pranuar asnjëherë ndonjë akuzë dhe vazhdimisht e cilëson gjykimin ndaj tij si të “turpshëm”. Republikani u shpall fajtor për falsifikimin e regjistrave të biznesit për të ndikuar në mënyrë të jashtëligjshme sic pretendon organi i akuzës në zgjedhjet presidenciale të vitit 2016, përmes pagesave për heshtjen e një aktoreje të filmave për të rritur, që thotë se ka patur marrëdhënie intime me të e që pretendon se po të kishte folur publikisht për këtë gjë, do t’ia kishte dëmtuar asokohe fushatën të nominuarit republikan.