Takimi i radhës mes Volodymyr Zelenskyt dhe Donald Trumpit, i paralajmëruar nga vetë presidenti ukrainas në mëdiat sociale, mund të mbahet të dielën më 28 dhjetor, në Mar-a-Lago të Floridës. Lajmin e përcjell "Kiev Post", duke cituar një burim diplomatik. "Ne kemi rënë dakord për një takim të nivelit më të lartë me Presidentin Trump në të ardhmen e afërt. Shumë gjëra mund të vendosen para Vitit të Ri", shkroi Zelensky, pas përditësimeve të fundit që kishte marrë nga kryenegociatori ukrainas Rustem Umerov, i cili e informoi lidhur me kontaktet e tij të fundit me palën amerikane. "Nuk po humbasim asnjë ditë", theksoi presidenti ukrainas në postimin e tij. Njoftimi i tij erdhi në kohën kur Forcat e Mbrojtjes Ajrore të Ukrainës thanë se kishin rrëzuar apo neutralizuar 73 dronë, kryesisht të tipit Shahed, nga të paktën 99 që u lëshuan gjatë natës nga rusët mbi territorin ukrainas, si dhe një raketë balistike Iskander-M. Ndërkohë, këshilltari presidencial i Ukrainës, Mykhailo Podolyak, deklaroi se Franca, Gjermania, Turqia dhe Mbretëria e Bashkuar janë të gatshme të dërgojnë forca paqeruajtëse në Ukrainë pasi të përfundojë lufta. Sipas tij, paqja e qëndrueshme është e pamundur pa partnerë ndërkombëtarë, teksa këmbënguli se edhe Bashkimi Europian do të duhet të largojë iluzionet dhe të bëhet më aktiv ushtarakisht nëse dëshiron të mbijetojë në realitetin e ri.