Ministri i Jashtëm i Danimarkës ka reaguar pasi Presidenti amerikan Donald Trump përsëriti dëshirën e tij për të blerë Groenlandën në një nga fjalimet e tij. “Nuk mundesh ta marrësh Groenlandën vetëm sepse dëshiron. Sigurisht që nuk mund të kemi një rend botëror ku shtetet e mëdha, pavarësisht se si quhen, mund të marrin çdo gjë që duan”, tha ministri i Jashtëm danez, Lars Løkke Rasmussen pas fjalëve të Trump për blerjen e saj. Løkke Rasmussen tha se ishte veçanërisht i shqetësuar për “retorikën” e presidentit të ri rreth zgjerimin të SHBA-së përtej territoreve të tanishme. Mediat daneze raportuan se një seri bisedimesh urgjente me politikanë dhe drejtues biznesi u mbajtën gjatë gjithë ditës së sotme. Ndërkohë qeveria daneze po shqyrton përgjigjen e saj ndaj komenteve të djeshme të Trump për Groenlandën në një nga fjalimet e inaugurimit. “Groenlanda është një vend i mrekullueshëm, na duhet për siguri ndërkombëtare”, tha Trump në një nga fjalimet e djeshme. Edhe kryeministri i Groenlandës ka deklaruar se shteti i tij nuk dëshiron që të jetë pjesë e Amerikës. Ai është shprehur se “Ne jemi Groenlandezë. Ne nuk duam të jemi amerikanë. Ne nuk duam të jemi as danezë. E ardhmja e Groenlandës do të vendoset nga Groenlanda”.