Për herë të parë pas dy javësh sulme në shkallë të gjerë në të gjithë Iranin, presidenti amerikan, Donald Trump, urdhëroi ushtrinë të ndalë operacionet. Presidenti Trump i kërkoi ushtrisë të mos kryejë më sulme të reja ndaj Iranit, thanë dy burime për median amerikane “Axios”. Urdhri i presidentit erdhi pasi ai miratoi sulme të përditshme gjatë 13 ditëve të mëparshme. Vendimi i Trump pasqyron gatishmërinë e tij për të ofruar më shumë hapësirë për diplomacinë. Urdhri i Trump për të ndaluar sulmet u dha disa orë pasi një delegacion i Omanit mbërriti në Teheran për bisedime mbi një marrëveshje të re për të rihapur Ngushticën e Hormuzit. Dy burime rajonale me njohuri për negociatat i thanë “Axios” se është bërë përparim në bisedime dhe se një marrëveshje midis Omanit dhe Iranit mund të arrihet gjatë fundjavës. Më herët, edhe kreu i Shtëpisë së Bardhë konfirmoi se bisedimet mes palëve vijonin për të gjetur një rrugë për armëpushim. Pakistani njoftoi se ka nisur përpjekjet për të ulur sërish në tryezën e negociatave Uashingtonin dhe Teheranin. Ky i fundit shprehu gatishmëri për negociata, duke theksuar se duhet t’i jepet fund konfliktit disa-mujor, që ka lënë pas shkatërrime të mëdha në Lindjen e Mesme, si dhe ka krijuar një ndër krizat më të mëdha ekonomike në botë, me mbylljen e Ngushticës së Hormuzit, ku kalon pjesa më e madhe e naftës.