Presidenti i SHBA-së, Donald Trump, i ka kërkuar Iranit të mërkurën të ulet në tryezë dhe të arrijë një marrëveshje për armët bërthamore, përndryshe sulmi i ardhshëm i SHBA-së do të jetë shumë më i keq. "Shpresojmë që Irani të ulet në tryezë shpejt dhe të negociojë një marrëveshje të drejtë dhe të barabartë. Jo armë bërthamore, por një marrëveshje që është e mirë për të gjitha palët. Koha po mbaron, është vërtet thelbësore”, ka shkruar Trumpi në një postim në rrjetet sociale. Presidenti republikan i SHBA-së, i cili u tërhoq nga një marrëveshje bërthamore shumëkombëshe e vitit 2015 me Teheranin gjatë mandatit të tij të parë në Shtëpinë e Bardhë, ka vërë në dukje se paralajmërimi i tij i fundit ndaj Iranit u pasua nga një sulm ushtarak. "Sulmi i ardhshëm do të jetë shumë më i keq! Mos e bëni këtë të ndodhë përsëri", ka shkruar Trumpi. Ai ka njoftuar gjithashtu se një tjetër "armatë" po lundron drejt Iranit. Të mërkurën është bërë e ditur po ashtu se SHBA-ja do të nisë stërvitje ushtarake në Lindjen e Mesme, mes tensioneve të shtuara me Iranin. Një ditë më parë, atje ka arritur edhe aeroplanmbajtësja “Abraham Lincoln”.