Presidenti amerikan, Donald Trump, tha se Ukraina është mosmirënjohëse, që nuk pranon planin e ri të paqes për t’i dhënë fund luftës me Rusinë, duke i falur kësaj të fundit një pjesë të territoreve. Deklarata e fortë e Trump erdhi në një kohë, kur në Gjeneve po zhvillonin bisedime diplomatët nga Shtetet e Bashkuara, Ukraina, Britania, Franca dhe Gjermania për bisedime rreth planit me 28 pika, i cili synon t’i japë fund konfliktit më të madh në Evropë që prej Luftës së Dytë Botërore. “Lufta mes Rusisë dhe Ukrainës është e dhunshme dhe e tmerrshme. Udhëheqja e Ukrainës ka shprehur zero mirënjohje për përpjekjet tona për t’i dhënë fund dhe Evropa vazhdon të blejë naftë nga Rusia. SHBA vazhdon t’i shesë sasi masive armësh NATO-s për t’i shpërndarë në Ukrainë. Zoti i bekoftë të gjitha jetët e humbura në katastrofën njerëzore”, u shpreh Presidenti Trump. Bisedimet në qytetin buzë liqenit në Zvicër u zhvilluan teksa mbështetësit evropianë të Ukrainës kanë shprehur shqetësim lidhur me hollësitë e propozimit për ndalimin e luftimeve që kanë vazhduar qëkurse Rusia e nisi pushtimin e plotë të vendit fqinj në shkurt 2022. Menjëherë pas takimit në Gjenevë, Sekretari i Shtetit, Marco Rubio, e cilësoi takimin më produktiv dhe më kuptimplotin në të gjithë procesin e negociatave. Plani i ri i SHBA-së ende nuk është bërë zyrtarisht publik, por elementet kryesore të tij janë zbuluar, duke nxitur aleatët e Kievit të sugjerojnë se ai anon fuqishëm në favor të Rusisë. Shumë prej kushteve të marrëveshjes kërkojnë lëshime të mëdha nga Kievi dhe duket se pasqyrojnë shumë prej kërkesave të Kremlinit, përfshirë dorëzimin e rajoneve ukrainase Donjeck dhe Luhansk - të njohura si Donbas - dhe të Krimesë, si dhe vendosjen e kufizimeve mbi madhësinë e ushtrisë ukrainase.