Urdhri ekzekutiv i Presidentit Donald Trump për të pezulluar të gjitha fondet mbështetëse të qeverisë amerikane ka prekur edhe SPAK-un. Top Channel ka parë letrën që ambasada amerikane në Tiranë i ka dërguar qeverisë shqiptare përmes Ministrisë për Europën dhe Punët e Jashtme. “Ambasada e Shteteve të Bashkuara të Amerikës i shpreh përshëndetjet e saj Ministrisë për Europën dhe Punët e Jashtme të Qeverisë së Republikës së Shqipërisë dhe dëshiron të informojë Qeverinë e Republikës së Shqipërisë për qëllimin e Urdhrit Ekzekutiv të Qeverisë së SHBA-së për të pezulluar zbatimin, detyrimet e reja dhe shpërndarjen e fondeve në pritje të një rishikimi të të gjitha programeve të ndihmës së huaj”, thuhet në hyrje të letrës. Në katër faqet e saj renditen të gjitha institucionet të cilat deri më tani përfitonin fonde nga qeveria amerikane dhe që pas fitores së urdhrit nga Presidenti Trump, ato pezullohen. Në faqen e tretë të letrës ku renditen institucionet e drejtësisë, fondet e të cilave janë pezulluar, përmendet edhe SPAK-u, si dhe GJKKO-ja. Në listën e institucioneve që nuk do të marrin më fonde të taksapaguesve amerikanë deri në rishikimin e të gjitha programeve, janë edhe disa ministri, institucione të të gjitha niveleve të drejtësisë si dhe disa drejtori të rëndësishme si OSHEE, AKSHI, AKSK, SASPAC si dhe qeverisja vendore. Pas këtij urdhri ajo që mbetet për t’u parë është fakti se si do të vijojë funksionimi i këtyre institucioneve të ngritura në zbatim të Reformës në Drejtësi, ku përveç buxhetit të akorduar nga shteti, ato merrnin edhe fonde nga qeveria amerikane.