Organizata Botërore e Shëndetësisë është detyruar të shkurtojë operacionet dhe të pushojë punonjës, pas vendimit të Donald Trump për të shkurtuar fondet. “Rënia e papritur e të ardhurave na ka lënë me një boshllëk të madh në paga dhe pa zgjidhje tjetër veçse të zvogëlojmë përmasën e punës dhe fuqisë punëtore”, u shpreh kreu i OBSH, Tedros Adhanom Ghebreyesus. Administrata e presidentit të SHBA-së, Donald Trump, ka refuzuar gjithashtu të paguajë kuotat e anëtarësimit të dakorduara — të quajtura kontribute të vlerësuara — për vitet 2024 dhe 2025, ndërsa ka ngrirë pothuajse të gjitha ndihmat e jashtme amerikane, përfshirë edhe ndihmën masive për projektet shëndetësore në mbarë botën. Përballë kësaj situate, OBSH ka vendosur të formojë një strukturë të re organizative, të cilën Tedros e paraqiti për stafin dhe shtetet anëtare të martën. “Po përballemi me një boshllëk në pagat për bienalin 2026–27 nga 560 deri në 650 milionë dollarë”, pranoi ai, duke theksuar se më shumë shkurtime punonjësish do ketë në selinë e organizatës në Gjenevë. “Po e zvogëlojmë ekipin drejtues të lartë në seli nga 12 në 7, dhe numri i departamenteve do të reduktohet më shumë se përgjysmë, nga 76 në 34”, deklaroi kreu i OBSH, duke shtuar se “Këto janë vendime shumë të dhimbshme për të gjithë ne.”