Presidenti amerikan, Donald Trump, tha se do të vendosë tarifa prej 25 për qind ndaj Japonisë dhe Koresë së Jugut, duke rritur presionin ndaj dy aleatëve amerikanë dhe dhjetëra ekonomive tjera për të arritur marrëveshje tregtare me Uashingtonin. Trump u ka nisur letra të ngjashme liderëve të Afrikës së Jugut, Malajzisë, Mianmarit, Laosit dhe Kazakistanit, duke thënë se do t’i godasë me tarifa produktet e tyre, prej 25 deri në 40 për qind. Në letrat dërguar liderëve të Japonisë dhe Koresë së Jugut, Trump u shpreh se rritja e tarifave do të ndodhë pasi marrëdhëniet tregtare me Uashingtonin, “fatkeqësisht janë larg reciprokes”. Në letra është thënë se data e fundit për hyrje në fuqi të tarifave është 1 gushti dhe ka paralajmëruar për përshkallëzim të mëtejshëm nëse shtetet e përfshira hakmerren me kundërmasa. Aktualisht, këto shtete janë goditur me 10 për qind tarifë – masë që Trumpi e zbaton në pothuajse të gjithë partnerët tregtarë. Megjithatë, presidenti amerikan ka thënë se është i gatshëm t’i ulë tarifat nëse shtetet i ndryshojnë politikat tregtare. Kryeministri i Japonisë, Shigeru Ishiba, theksoi se “nuk do të bëjë lehtësisht kompromis” në bisedimet tregtare me Uashingtonin. Deri më tani, Uashingtoni ka arritur marrëveshje tregtare vetëm me Britaninë dhe Vietnamin, ndërsa Shtetet e Bashkuara dhe Kina janë pajtuar për t’i ulur përkohësisht tarifat në produktet e njëra-tjetrës, që shkonin në mbi 100 për qind.