“Donald Trump shpëtoi se lëvizi kokën dhe jo se atentatori gaboi. Ky është një dështim i shërbimeve sekrete”. Në këtë konkluzion kanë arritur disa nga ekspertët e sigurisë në amerikë, të cilët thonë se sulmi ndaj kandidatit republikan ishte dështim pas dështimi. Ish-agjenti i Shërbimit Sekret, Timoti Miller, i tha BBC-së se ajo që ndodhi në plagosjen e Donald Trump në Pensilvani ishte “një fije floku larg nga një vrasje presidenciale”. “Përtej enigmës se si depërtoi agresori i armatosur brenda perimetrit të sigurisë, një dilemë tjetër është edhe reagimi i tyre pasi e identifikuan mbi çati. Ekipet e kundër-snajperëve duhet të kishin ndërmarrë veprime menjëherë dhe siç duhet”, thotë Miller. “Por ne e pamë të gjithë se ata reaguan me vonesë dhe ky është dështim pas dështimi,” shton ai. Nën akuzë është shefja e shërbimeve sekrete, Kimberli Çetëll, e cila megjithëse ka shpjeguar se gjithçka është bërë sipas protokollit dhe reagimi ishte mbresëlënës, nuk i ka qetësuar zërat e kongresmenëve nga të dy kampet që kërkojnë shkarkimin e saj. Ndërkaq, pas ngjarjes së rëndë në Florida, gjykata rrëzoi çështjen penale kundër Trump për fshehjen e dokumenteve të klasifikuara shtetërore në shtëpinë e tij. Ish-presidenti reagoi në rrjetin social TRUTH duke kërkuar rrëzimin e të gjitha akuzave të tjera Pamjet: AFP